Johansen har jobba som VA-ingeniør i Giske kommune dei siste tre åra og tek til i den nye stillinga allereie mandag 7. april.  

-          Eg ser fram til å ta fatt på jobben, få nye utfordringar og også ha mulegheit til å påverke beslutningar. Giske kommune har mange spennande oppgåver å ta fatt i framover og vi arbeider med mange utviklingsprosjekt. Eg trivest godt, spesielt saman med mange hyggelege og kompetente kollegaer, seier Johansen.  

Han har lang leiarerfaring frå Ålesund kommune der han leia ei driftsavdeling på avløp i om lag 15 år. Han trivest godt med leiaroppgåve og det å få til ting i lag med andre. Nokre av fagfelta er nye, men han kjenner godt til problemstillingane og ulike lovverk.

-          Eg får med meg mange flinke folk, så dette skal vi få til saman, seier han.

Johansen seier han set stor pris på den gode felleskapskjensla i kommunen.

-          Vi hjelper kvarandre og tek tak i ting i lag. Her spiser vi lunsj med både prest, ordførar, vaktmeister og vi som jobbar i administrasjonen. Det er ei god hjelp, seier han.

Hans Olav Naas går til jobben som gruppeleiar for vegingeniørar og geologar i Asplan Viak.  Han har hatt kjekke år i Giske kommune.

-          Det har vore to raske år. Tida har gått veldig fort. Det har vore kjekt og veldig lærerikt. Eg visste ikkje kva eg gjekk til i kommunal sektor. Det har vore kjekke folk å jobbe med og mange spennande saker og diskusjonar. Eg har lært mykje nytt, seier han.

Kommunalsjef Ann-Heidi P. Orvik er særs glad for å få Svein Andre med på laget i Samfunn. Hans tidlegare leiarerfaring vil vere til stor nytte i vidare omstillingsarbeid.